Ar brynhawn braf ond oer ddydd Sadwrn, roedd Met Caerdydd yn edrych i sicrhau buddugoliaeth annisgwyl yn erbyn Pen-y-bont, a oedd wedi mwynhau dechrau gwych i’r tymor, gan eistedd yn drydydd yn Uwch Gynghrair Cymru. Roedd gan y ddau dîm gefnogaeth dda, gyda grwpiau o gefnogwyr ifanc a’u drymiau ar ochrau cyferbyn y stadiwm. Daeth Pen-y-bont i’r gêm yn hyderus y gallent gael buddugoliaeth, ac roedd cefnogwyr yr ymwelwyr yn rhannu’r hyder. Gwnaeth yr ymwelwyr dri newid i’r tîm a ddechreuodd eu buddugoliaeth yn y Cwpan yn erbyn Afan Lido, gyda Davies, Jefferies a Liam Sheppard yn dychwelyd i’r tîm. O ran y tîm cartref, nid oedd unrhyw newidiadau i Met Caerdydd o’u gêm gyfartal oddi cartref yn erbyn Bae Colwyn. Met Caerdydd gychwynnodd y gêm, er bod llawer yn disgwyl mai dim ond mater o amser fyddai hi cyn i Pen y bont ddechrau dangos eu gallu. Ymhlith chwaraewyr yr ymwelwyr roedd dau gyn-chwaraewr o’r bencampwriaeth yn Lloegr, sef Tyler Walker, a chwaraeodd yn fwyaf nodedig i Nottingham Forest, a Jonathan Leko, a chwaraeodd i Birmingham City, West Bromwich Albion a Charlton, ymhlith eraill. A fyddai’r chwaraewyr hyn yn allweddol i lwyddiant yr ymwelwyr? Dechreuodd y ddau dîm yn gymharol araf, heb gyrraedd tempo uchel iawn yn ystod traean cyntaf yr hanner cyntaf. Wrth i’r hanner cyntaf ddatblygu, Pen y bont oedd yn mwynhau’r rhan fwyaf o’r bêl ac yn dechrau creu cyfleoedd. Daeth y cyfle cyntaf i Bont lawr yr ochr dde, wrth i’r bêl gael ei phasio o’r asgell i mewn at Walker. Roedd ef ei hun yn edrych i barhau â’i rediad gwych o ffurf hyd yma’r tymor, ond aeth ei ergyd bwerus i rwyd ochr y gôl. Wrth i’r ddau dîm setlo i mewn i’r gêm, roedd Met Caerdydd yn chwarae’n dda gyda gwasg llawer uwch na’r disgwyl, gan geisio ennill y bêl yng nghanol y cae yn dilyn unrhyw gamgymeriad neu Pen y bont. Roedd Pen y bont hefyd yn defnyddio llinell wasgu gymharol uchel, gan geisio chwarae peli dros bedwar cefnwr Met Caerdydd i fannau y gallai Walker redeg atynt. Wrth i gefnogwyr yr ymwelwyr ganu a chefnogi eu tîm, enillodd Pen y bont gic rydd tua 30 llath o’r gôl ar yr ochr dde bellaf. Chwaraewyd y bêl yn bwerus i mewn i’r cwrt cosbi, cafodd ei phenio i lawr, ond llwyddodd gôl-geidwad Met Caerdydd i’w harbed. Daeth eiliad o bryder i’r ymwelwyr, wrth i Jefferies, a oedd newydd ddychwelyd i’r un ar ddeg cychwynnol, fynd i lawr yn dilyn tacl hwyr gan amddiffynnwr Met Caerdydd. Bu’n rhaid iddo adael y cae, a daeth yr Eduino Vaz profiadol ymlaen yn ei le. Daeth cyfle nesaf y gêm unwaith eto i Ben y bont. Enillwyd y bêl yng nghanol y cae yn dilyn cyffyrddiad gwael gan chwaraewr canol cae Met Caerdydd. Yna cafodd y bêl ei chwarae allan yn ofalus at Nathan Wood ar yr ochr chwith. Derbyniodd Wood y bêl yn ei gam cyn torri i mewn i’r canol. O ychydig y tu allan i’r cwrt cosbi, gwelodd fwlch ac anelodd ato, gan osod yr ergyd o dan fraich dde’r gôl geidwad i roi Pen y bont ar y blaen. Gyda chefnogaeth yr ymwelwyr yn dod yn uwch, cafodd Pen-y-bont gyfle arall funud yn unig yn ddiweddarach. Chwaraewyd y bêl yn gyflym lawr yr ochr chwith at Wood. Croesodd y bêl mewn i’r cwrt cosbi, lle tarodd Mehew y bêl, gan ei hanfon heibio gôl geidwad i ymestyn mantais Pen y bont. Parhaodd Pen y bont i ddominyddu ac edrych i ymestyn eu mantais ymhellach. Chwaraewyd y bêl lawr yr ochr dde gan yr ymwelwyr cyn ei phasio i mewn at Tyler Walker, a oedd wedi disgyn yn ddyfnach i dderbyn y bêl. Chwaraeodd Walker bas cyn rhedeg y tu ôl i linell amddiffyn Met Caerdydd, gan gyrraedd diwedd y pas trwodd dilynol. Anelodd ei ergyd at y postyn agos a rhoddodd y gêm y tu hwnt i gyrraedd Met Caerdydd ar ôl dim ond 36 munud. Daeth gweithred olaf yr hanner cyntaf o gornel i Met Caerdydd. Chwaraewyd y bêl i mewn o’r ochr dde a phennwyd y bêl ymlaen tuag at y post cefn. Yn anffodus i’r tîm cartref, nid oedd neb yno i benio’r bêl i’r rhwyd, a daeth yr hanner cyntaf i ben gyda Pen-y-bont â mantais ddominyddol.
Dechreuodd Pen y bont yr ail hanner gan edrych i barhau o’r man lle’r oeddent wedi gorffen yn yr hanner cyntaf. Dechreuodd y gêm gyda’r ddwy dîm yn agor y chwarae ychydig yn fwy, gan ganiatáu i’r naill ochr a’r llall gael cyfnodau gyda’r bêl. Roedd perfformiad Wood yn parhau i wella, ond Met Caerdydd gafodd y cyfle clir cyntaf yn yr ail hanner. Daeth Mwandwe lawr yr ochr chwith i’r tîm cartref, gan ddriblo heibio i ddau amddiffynnwr cyn mynd i mewn i’r cwrt cosbi. Wrth iddo symud drwy’r ardal, estynnodd Sheppard ei goes mewn ymdrech olaf i ennill y bêl, ond tarodd Mwandwe a’i anfon i’r llawr. Roedd chwaraewyr Met Caerdydd yn sicr y byddai’r dyfarnwr yn dyfarnu cic o’r smotyn, ond ailddechreuodd y gêm heb unrhyw gosb yn cael ei rhoi. Ar ôl y cyfle hwn, cafodd Met Caerdydd drafferth i gael cyffyrddiad â’r bêl wrth i Ben y bont, gyda’u cefnogwyr ifanc teithiol yn eu hannog ymlaen, barhau i reoli’r gêm. Daeth cyfle nesaf y gêm o wrthymosodiad cyflym gan Ben y bont. Camodd un o amddiffynwyr canolog Met Caerdydd allan o’i safle mewn ymgais i ennill y bêl, ond yn hytrach agorodd ofod y tu ôl iddo i Tom Mehew fanteisio arno. Chwaraewyd y bêl ato, ac fe’i gosododd yn hyderus i’r gornel chwith isaf i sgorio ei ail gôl o’r prynhawn. Dim ond cwpl o funudau’n ddiweddarach roedd Pen-y-bont yn ymosod unwaith eto. Y tro hwn, cyrhaeddodd pêl lawr yr ochr chwith Nathan Wood, a chwaraeodd y bêl i ganol y cae at Tom Mehew. Tarodd Mehew y bêl yn rymus heibio gôl geidwad i sgorio pumed gôl Pen-y-bont o’r prynhawn a chwblhau ei hatric. Gyda chanlyniad y gêm wedi penderfynu, ceisiodd Met Caerdydd wneud y gorau o’r amser oedd yn weddill, wrth iddynt fwynhau’r rhan fwyaf o’r meddiant. Gyda’r ddau dîm yn paratoi i wneud eilyddion, ac yn fwyaf nodedig Jonathan Leko yn dod ymlaen i’r y cae i Ben y bont, enillodd Met Caerdydd gic rydd yn nhraean amddiffynnol Pen-y-bont. Croeswyd y bêl i mewn a’i phenio ar draws wyneb y gôl, ond nid oedd neb yno i orffen y symudiad i’r tîm cartref. Gyda dim ond ychydig funudau’n weddill, roedd y gêm eisoes wedi colli ei momentwm, wrth i’r ddau dîm wybod beth fyddai’r canlyniad. Daeth y gêm i ben gyda chefnogwyr teithiol Pen y bont yn dathlu, a’r tîm yn sicrhau tri phwynt hollbwysig i gadarnhau eu safle yn drydydd yn nhabl Uwch Gynghrair Cymru.
Diwedd y Gêm– Cardiff Met FC 0 – 5 Penybont FC
